Dus ging ik vandoage even kieken noar t wandelpad dat nuimd is noar mien ol hoesdokter Dr. Jan Jacob Boer.
De Toalroute lopt deur t veld over t Zeuvenbrogjespad.
Boer wuir op 9 oktober 1927 geboren op Dale en kwam op 14 feberwoarie 2011 oettied op De Wieke. Hai was hoesdokter in Alteveer en Onstwedde. Loater wuir hai de boas van t zaikenhoes op Knoal en doarnoa van Open Hoaven in Veendam. Ook was Boer van 1967 - 1970 veurzitter van Onstwedder Boys.
t Doktershoes (Dörpsstroade 25 in Onstwedde) ston schuun tegenover de legere school doar zien kinder Jaap, Coby en Jan Jaap ook hin gingen. Op dij school zaten ook wel ais kinder dij kaddekwooad oethuilen. Ain van de schooljonken mog geern even bie dokter aanbellen en votlopen. Op n dag kreeg Boer hom te pakken. Hai greep n haile dikke spuide en zee: "Nou most op school vertellen dat ik die as straf n spuide geven heb en as dat nait dust geef ik die nou echt n spuide". Wie kregen dat verhoal dus op school te heuren. Gainaine het doar weer aan t deurtjebellen west. Loater las ik dit verhoal weerom in de wekelijkse rubriek van Boer in de Nijsbode (De Koerier).
Veul indrok muik ook het verhoal dat dokter mit n kever over de sloot kon springen en t verhoal van Loze Wubbe dij luit zien voader mit n betoalcheque van drij doezend gulden t graf ingoan.
Loater dou ik aan t waark was veur Radio Noord kwam ik hom voak tegen as bestuurder van 'Grunneger Bouk. Bie hom thoes op De Wieke heb ik nog n oetzenden opnomen dou hai aan t waark was mit "Dij t dut mout t waiten". n bouk mit Grunneger spreekwoorden. Nait op n kompjoeter mor op n ol typemesien. Doar schreef hai t spreekwoord op in t Grunnegs en doaronder de oetleg in t Nederlands. Elk spreekwoord haar zien aigen strookje. Dij kon hai den zo op volgorde leggen. Ik heb ons gesprek goud bewoard en lest nog n moal beluusterd. Mit gutege oogkes vruig hai mie dou: Waist wat betaikent - Zai het de Fransen veur Delfziel liggen ? Dat wos ik nait 🤣.
Hai schoot in de lach en vertelde mie t gehaim.
Willen ie meer waiten ?
De Toalroute is tot stand kommen deur mitwaarken van de Stichten Grunneger Toal, pervincie Grunnen, Centrum Grunneger Toal & cultuur, gemainte Veendam, de stichten Dr. Jan J. Boer en Leader Oost Grunnen het ook wat geld in t puutje doan.
Klik hier veur details van de 1.5 km lange route
Kiek dan even op webstee van stichten Dr. Jan J. Boer.
Op weeromraaize bin k nog even de begroafploatse aan de Dalweg oplopen.
O joa, nog even over dat spreekwoord.
In Boer zien bouk "Dij t dut mout t waiten" stait op bladziede 94 onder nr 67 de Nederlandse vertoalen.
Geen opmerkingen:
Een reactie posten